黎啟峰Edward｜首支唱作作品〈三生有幸給挑選〉談寵物情緣｜Channel音樂

黎啟峰Edward｜首支唱作作品〈三生有幸給挑選〉談寵物情緣｜Channel音樂

2022年，土城娛樂首位藝人黎啟峰（Edward）正式出道，以自家創作〈三生有幸給挑選〉踏上唱作歌手的征途，以「說故事的人」的身份，與樂迷分享音樂。 曾參加《全民造星》的Edward本是教師，工餘時間一星期兩天在餐廳演唱，怎料被剛巧前去用餐的土城娛樂營運總監聽到其歌聲，認識後繼而簽約成為歌手。「成個過程好奇幻，純為興趣去表演，冇諗過會有星探或者有任何人提攜我，有咩魅力吸引到佢哋？我都答唔到。」話雖如此，Edward自覺一生人都十分幸運，在2022年這個艱難時刻仍有機會出歌做歌手，公司還為他太灑金錢落廣告兼出動宣傳車遊走各區，以強勢出擊，所以他決心要以好歌及成績去答謝公司。 Edward向來有寫歌，今次首支派台作品〈三生有幸給挑選〉，就用上他作曲的作品。「〈三生有幸給挑選〉講嘅係寵物同主人之間嘅關係，由開始養寵物，到佢哋生病或者老死而離開嘅感受，而MV就係講離開之後點樣面對寵物嘅離別，點樣梳理自己唔開心嘅情緒。首歌由我作曲，我嘅大學同學文偉業填詞，佢係我大學時期一齊創作嘅老伙伴，今次寫好曲之後，文偉業來回只係寫過一稿，完全冇改過，佢好清楚我想要啲乜嘢，我亦好欣賞佢著墨嘅地方，佢好鍾意用一啲好理性嘅手法，例如『誰人都知一生多兜轉』，嚟形容寵物離世嘅必經階段，就係好好嘅例子。」至於編曲部份，Edward找來曾為姜濤〈Dear My Friend〉編曲的Y. Siu操刀，Edward邀請對方參與，原來是有原因，他說：「我同營運總監都好鍾意姜濤〈Dear My Friend〉，而且〈Dear My Friend〉講朋友離世，〈三生有幸給挑選〉係講寵物嘅離開，兩者都有相似嘅地方，所以我哋相信Y. Siu可以為我哋首歌做到類同嘅效果，而經討論後，佢都特別為我首歌加入弦樂嘅部份，去加強傷感嘅感覺。」 身為唱作人，Edward坦言有很多題材想寫，但他最想做一個「講故事的人（Storyteller）」，他說：「我好想透過音樂、旋律，令到大家有共鳴，但除咗唱情歌之外，都可以帶俾觀眾更多嘅主題嘅同時，亦想幫大家講佢哋嘅故事，所以之後嚟緊會有多兩首同寵物有關嘅歌曲，會同〈三生有幸給挑選〉成為一個系列，另外亦想做一啲同情緒、心靈有關嘅歌曲，帶俾大家多啲心靈上面嘅慰藉。」 ========================== HONG KONG SINGER CHANNEL 💛唱出心聲💛活出生趣💛音樂｜生活｜電影💛 Follow我哋👇🏻👇🏻🥰🥰 ▶️Facebook: Hong Kong Singer Channel ▶️Youtube: hksingerchannel ▶️Website: www.hksingerchannel ▶️Instagram: hkscchannel #hksingerchannel#hongkonsingerchannel#香港歌手#hksinger#hksinging#hkscchannel#歌手#hkig#黎啟峰#Edward#三生有幸給挑選#全民造星#99強